საქართველოს ფარმაცევტთა ასოციაციის, თბილისის სახელმწიფო უნივერსიტეტის ფარმაციის ფაკულტეტის და მაისურაძეთა საგვარეულო კავშირის ინიციატივით, ამაწლის 2 მარტს თბილისის სახელმწიფო სამედიცინო უნივერსიტეტის სააქტო დარბაზში გაიმართა მაისურაძეთა საგვარეულო კავშირის ყოფილი თავმჯდომარის, თენგიზ ივანეს ძე მაისურაძის წიგნის „ქართული ფარმაცია და მაისურაძეები“-ს პრეზენტაცია.
პრეზენტაციას ესწრებოდნენ სამედიცინო უნივერსიტეტის პროფესორ-მასწავლებლები და სტუდენტები, წიგნის ავტორის ნათესავები და თანაკლასელები, მაისურაძეთა საგვარეულო კავშირის აქტივი, სრულიად საქართველოს საგვარეულოთა კავშირის „გვარი და გვარიშვილობა“-ს გამგეობის წევრები და მედიის წარმომადგენლები.
პრეზენტაცია გახსნა ფარმაციის ფაკულტეტის დეკანმა, ასოცირებულმა პროფესორმა, ქალბატონმა დალი ბერაშვილმა. წიგნის შესახებ, რომელიც ეძღვნება მაისურაძეების პირველი აფთიაქის გახსნის 150 წლის თავს, საინტერესო მოხსენება გააკეთა ავტორმა თენგიზ მაისურაძემ. სიტყვით გამოვიდნენ საქართველოს ფარმაცევტთა ასოციაციის პრეზიდენტი, პროფესორი ალიოშა ბაკურიძე, საქართველოს მედიცინის მეცნიერებათა აკადემიის აკადემიკოსი, პროფესორი რამაზ შენგელია, სამედიცინო უნივერსიტეტის პროფესორი ბესიკ კოჭლამაზაშვილი და წიგნის ავტორის თანაკლასელი, არქიტექტურის პროფესორი თემურ ჯორჯაძე, რომლებმაც ერთხმად აღნიშნეს წიგნის ისტორიული მნიშვნელობა, სადაც დოკუმენტალურად არის აღწერილი IX-X საუკუნეებში ქართულ ფარმაციაში ბატონ თენგიზ მაისურაძის უშუალო წინაპრების საქმიანობა.