2015 წლის 4 ოქტომბერს „მაისურაძეთა საგავარეულო კავშირის“ აქტიური ნაწილი, საგვარეულო დროშით ეწვია სოფელ ოლოზს.
სოფელი ოლოზი მდებარეობს გორის რაიონში, მდინარე ათრეულას ხეობაში, ქ. გორიდან 20 კმ. მანძილზე. სოფელი განფენილია მდინარის ორივე ნაპირზე და შემოსაზღვრულია შერეული ტყის მასივებით. სოფლის აღმოსავლეთით მდინარის მარცხენა ნაპირზე დგას ღვთიშობლის სახელობის დარბაზული ეკლესია. ეკლესია თარიღდება X-XI საუკუნეებით. იგი ნაგებია შირიმის ქვით (თლილი კვადრატებით). წლების მანძილზე ეკლესიის კედლები ძლიერ დაზიანდა, ჩამოინგრა, რეალურად შენარჩუნებილი იქნა მხოლოდ აღმოსავლეთის კედელი, უფრო სწორად მისი ნაწილი. თაღიც მთლიანად იყო ჩამონგრეული, შემორჩენილ კედლებში შეზრდილი იყო ხეები, იყო დაბზარული და დაფარული მიწით. როგორც შემდგომში აღმოჩნდა ეკლესიას გააჩნდა მინაშენებიც, რომლებიც ასევე ჩამოინგრა და დაიფარა მიწით. ასეთ მდგომარეობაში იყო ეკლესია, როდესაც წარმოშობით ამავე სოფლიდან ქ. თბილისში მცხოვრებმა მაისურაძეების ოჯახმა გადაწყვიტა აღედგინა ეს ისტორიული ძეგლი და დაებრუნებინა მისთვის პირვანდელი სახე. რისთვისაც მათ მიმართეს გორის ეპარქიას და ძეგლთადაცვის სააგენტოს, რათა ყველა მოსამზადებელი და აღდგენითი სამუშაოები განხორციელებულიყო კანონმდებლობის მოთხოვნათა სრული დაცვით. მოხდა ეკლესიისთვის განკუთვნილი და მიმდებარე მიწის ნახაზის შედგენა, გატარდა საჯარო რეესტრში. ეკლესიის არქეოლოგიური გათხრები დაიწყო 2010 წლის ნოემბერში და გაგრძელდა ორი სეზონის განმავლობაში. გათხრები წარიმართა სამთავისისა და გორის ეპარქიის მიტროპოლიტ ანდრიას ლოცვა კურთხევით. სამუშაოები შეთანხმებული იქნა საქართველოს კულტურული მემკვიდრეობის დაცვის ეროვნულ სააგენტოსთან.
ოლოზის ღვთისმშობლის არქეოლოგიური გათხრები, გაწმენდითი სამუშაოები, ტაძრის ჩრდილოეთით სამანქანო გზის გასამაგრებელი რკინა -ბეტონის კედლის აღმართვა და სარეკონსრუქციო პროექტი მთლიანად დაფინანსდა თინა და ზურაბ მაისურაძეების მიერ.
წარმოებული გათხრების შედეგად აღმოჩნდა არქეოლოგიური მასალა. სპეციალისტთა განმარტებით მასალა ეკლესიის არსებობის ორ სხვადასხვა პერიოდს მიეკუთვნება. მასალის ერთი ნაწილი შუასაუკუნეების (სოსანისფერი, მწვანე, ყვითელი,ლურჯი საღებავებით მორთული კერამიკის ჭურჭლის ფრაგმენტები), ხოლო მეორე ჯგუფში ერთიანდება ასევე კერამიკული ნაწარმი საყოფაცხოვრებო ჭურჭლის სახით, სადაც განირჩევა კოკის, ჯამის, ქოთნის, ჭრაქის ფრაგმენტები. ყველა არქეოლოგიური მასალა გაიწმინდა, დახარისხდა და ჩაბარდა გორის ეპარქიას. შემდგომ, შედგენილი რეაბილიტაციის პროექტის მიხედვით იქნა აღდგენილი ეკლესია,
რეაბილიტაციის პროექტი შეადგინა საავტორო ჯგუფმა: ხემძღვანელი-გ. სოსანიძე პროექტის მთავარი რესტავრატორი- თ. გაბუნია არქიტექტორი- ზ. ტაბატაძე, ინჟინერ-კონსტრუქტორი- გ. მაზმიშვილი, არქეოლოგი- დ. ბერიკაშვილი, ხელოვნებათა მცოდნე- გ. ბასილაშვილი, ტოპოგრაფი- მ. პაიჭაძე, მშენებლობას ხელმძღვანელობდა - თ.აბულაძე,
აღდგენითი სამუშაოები დასრულდა 2014 წელს. სამუშაოები ძირითადა დაფინანსდა გორის ეპარქიის მიერ. შემდგომში მაისურაძეებმა აღადგინეს მიმდებარე ტერიტორიის ინფრასტრუქტურა (კიბეები, წყალგაყვანილობა, ელექტრომომარაგება და სხვა). ცალკე პროექტის მიხედვით ეკლესიის შიგნით აღდგენილი იქნა ამბიონიც.
ყველა ეს სამუშაო დააფინანსა და-ძმა თინა, მერი,დალი და ზურაბ მაისურაძეებმა, ასევე წარმოშობით ოლოზიდან ქ.გორში მცხოვრებმა გიორგი ასკილაშვილმა. ეკლესიის დასავლეთ კედლის აღდგენისას, კედელში ჩაყოლებული იქნა წმ. ათონის მთიდან მაისურაძეების საგვარეულო კავშირის წევრების მიერ ჩამოტანილი მცირე ზომის ქვა.
ეკლესიის აღდგენაში მონაწილეობდა სოფლის მოსახლეობაც, განსაკუთრებით ახალგაზრდები. ყველა მათგანმა, თუნდაც მცირედი, მაგრამ თავისი წვლილი შეიტანა ისტორიული ძეგლის სტატუსის მქონე ოლოზის ღვთიშობლის სახელობის ეკლესიის აღდგენაში.
ა.წ. 4 ოქტომბერს გორისა და ატენის ეპარქიის მიტროპოლიტმა მეუფე ანდრიამ აკურთხა ოლოზის ღვთისმშობლის შობის სახელობის ეკლესია.
მეუფე ანდრიამ ეკლესიის მშენებლობაში შეტანილი განსაკუთრებული წვლილისათვის დალოცა და დააჯილდოვა მაცხოვრის და ღვთისმშობლის ხატებით, მეუფემ ასევე დალოცა მშენებლობაში მონაწილე ყველა ადამიანი და მთლიანად მაისურაძეთა გვარი.
მაისურაძეთა საგვარეულო კავშირმა წმ. ტაძარს შეწირა, აგრეთვე მაეუფე ანდრიას საჩუქრად გადასცა ბეთანიელი ბერების წმ. იოანე (მაისურაძის) და წმ. იოანე-გიორგი (მხეიძის) ხატები.
ლიტურგიას, ეკლესიის კურთხევას ესწებოდნენ: თენგიზ ივანეს-ძე მაისურაძე, მეუღლესთან ერთად, ომარ მაისურაძე მეუღლესთან ერთად, პაატა მაისურაძე მეუღლესთან ერთად, ბეჟან მაისურაძე მეუღლესთან ერთად, თენგიზ გურამის-ძე მაისურაძე მეუღლესთან ერთად, ნუგზარ მაისურაძე, ბადრი მაისურაძე, თეა-თეკლა მაისურაძე.
„მაისურაძეთა საგავარეულო კავშირის“ გამგეობის თავმჯდომარე თენგიზ მაისურაძე